Бектеши: Градот Скопје и општините во склоп на Градот барем да ги платат сметките за парно греење за месец декември

13.01.2022 10:46:23

Скопје, 12.01.2022 година   „Сакам да ги повикам Градот Скопје и општините во склоп на Градот Скопје барем да ги платат сметките за топлинска енергија за месец декември бидејќи до ден денес тоа не го направиле. Минимум што можат да направат е да ги платат сметките за парно греење“, кажа министерот за економија Крешник Бектеши во вечерашното гостување во Дневникот на Телевизија Сител.

Како што информираше министерот Бектеши, Градот Скопје и Општините согласно Законот за енергетика и Законот за комунална дејност се задолжени да обезбедат сигурност во снабдувањето со топлинска енергија за граѓаните, за што треба да бидат подготвени во рамки на своите Буџети кои ги усвоија на крајот на минатата година, кога веќе и беше прогласена енергетската криза, да обезбедат средства и да им излезат во пресрет на граѓаните

„Ако Градот Скопје и општините во склоп на Градот Скопје не се подготвени да покријат 20% од разликата од актуелната до реалната цена на топлинската енергија, како што предложи Владата, тогаш подготвени сме ние целосно односно 100% да ја покриеме оваа разлика“ кажа Бектеши.

Во однос на прашањето што ќе се случи доколку БЕГ не се согласува со овој предлог,  министерот Бектеши кажа дека Владата ќе ги искористи сите законски можности кои ги има на располагање, што значи доколку е потребно и одземање на лиценцата за работа и назначување на привремено управување.

„Сеуште се чека одговор и од компаниите кои имаат лиценца за производство, дистрибуција и снабдување со топлинска енергија, за што во текот на утрешниот ден Владата ќе донесе конечна одлука која ќе биде по предлог на Комисијата која е формирана за да ја следи ситуацијата со кризната состојба„ кажа министерот Бектеши и дополни дека ќе биде донесена одлука целосно да се стави во функција и ТЕ-ТО односно да работи и за време на викенд, да произведува и електрична и топлинска енергија во текот на целата недела, а не само во време на пикови.

Министерот Бектеши ги повика Градот Скопје, општините и сите институции да бидат солидарни во вакви кризни времиња и да им излезат во пресрет на граѓаните.